O Bosquejo histórico, político e religioso del antiguo reino de Galicia é unha breve síntese da historia de Galicia dende a Antigüidade ata o século XVII. A parte dedicada ao período medieval, que abrangue trinta e cinco páxinas (pp. 25-60), comeza pola chegada de Requila ao trono dos suevos e remata coa morte dos Reis Católicos. Seguindo unha estrutura lineal ou cronolóxica, o libro repasa algúns dos acontecementos políticos e militares máis salientables dos reinados de cada un dos monarcas que gobernaron o territorio galego. Dentro deste relato xeral, destácanse aqueles episodios e personaxes que afectaron a Galicia de maneira particular. Nun apéndice aos lectores galegos, Araujo ofrece máis información acerca do obxectivo do seu proxecto historiográfico: “El mayor sentimiento que ahora me aflige, es el de que carecéis de história; vuestra posición topográfica os aisla demasiado del resto de la familia Ibérica; y hasta el único hombre que pudiéra tenderos una mano en ese aislamiento en que vivís, acabais de perderle en un deplorable ostracísmo. Así pues, si queréis adquirirla; si deseáis legar un timbre de gloria á vuestros hijos, tendréis que labrar con vuestro único esfuerzo, ese bello edificio de inmortalidad” (p. 104).
Autor
Jacobo Araujo Tenreiro foi un historiador galego nacido en Viveiro. De ideoloxía liberal, escribiu varios folletos e artigos para xornais de Galicia e de Madrid. Un destes traballos, o Apéndice al juicio crítico del hombre y de la sociedad en general (1859), sufriu a censura do bispado de Mondoñedo, que o prohibiu “por contener máximas y expresiones nada conformes con la sana moral y buenas costumbres”. Porén, a obra máis ambiciosa e popular de Araujo foi este Bosquejo histórico, político y religioso del antiguo reino de Galicia, publicado en 1854.
Edicións
Existen dúas edicións do Bosquejo histórico, político y religioso del antiguo reino de Galicia. Son as seguintes:
- Jacobo Araujo, Bosquejo histórico, político y religioso del antiguo reino de Galicia, Pontevedra: Imprenta de la Viuda de Verea e Hijos, 1854.
- Jacobo Araujo, Bosquejo histórico, político y religioso del antiguo reino de Galicia, Viveiro: Seminario de Estudos “Terra de Viveiro”, 1995 (reprodución facsimilar da edición orixinal).
Perspectiva historiográfica
No seu Bosquejo histórico, político e religioso del antiguo reino de Galicia, Araujo escribe a historia medieval de Galicia dende unha perspectiva historicista, con especial atención á súa dimensión política.
Fontes
Os contidos medievais do Bosquejo histórico, político e religioso del antiguo reino de Galicia só inclúen referencias a fontes directas. Entre elas destacan as seguintes:
- Crónica de Sampiro (pp. s. XI).
- Chronicon mundi (ca. 1238), de Lucas de Tui.
- De rebus Hispaniae (ca. 1243), de Rodrigo Ximénez de Rada
Concepción do reino de Galicia
No Bosquejo histórico, político e religioso del antiguo reino de Galicia, a historia medieval de Galicia mantense integrada na historia medieval de España. Para Araujo, o concepto de “reino de Galicia” designa un “país” ou unha “provincia” dentro da monarquía hispánica, pero non unha estrutura política operativa despois do século VI. Xa que logo, a obra centra boa parte do seu discurso historiográfico na apropiación de acontecementos e personaxes característicos da historia de España. O caso de Pelaio é especialmente significativo: “Tras la desastrosa muerte de Rodrigo, se nos presenta D. Pelayo, el célebre restaurador de la dinastía, ese héroe, que se adjudican los Asturianos por originario suyo; siendo así, que su origen era gallego, yá como descendiente de los últimos vástagos de la primera dinastía, por ser bisnieto del Rey Chindasvinto é ya por haber sido criado y aclamado en Galicia por Rey, aunque retirado en Asturias, desde la muerte de su padre. Legiones escogidas de nuestro país fueron las que le ayudaron en la famosa obra de la Restauración, á quienes debe parte de su inmortal renombre” (pp. 35-36).
Non obstante, o texto tamén inclúe algúns dos episodios máis populares do imaxinario histórico galeguista do século XIX. Entre eles atópase, por exemplo, a formación do reino suevo: “Dueños absolutos los Suevos […] de toda Galicia, […] proclamaron de mancomún por Rey á Reciario, 5º de los Suevos, y primer Monarca Católico, que tendió los brazos á una fé que forma el timbre mas glorioso de los Gallegos, y la época mas brillante de su história, en los anales del Cristianísmo” (p. 25). Tamén destaca o asasinato do arcebispo Suero Gómez a mans de Fernán Pérez Churruchao, no contexto dos enfrontamentos entre Pedro I e Enrique de Trastámara: “Sublevándose el clero y el pueblo contra él [Pedro I] en todas partes, […] la Galicia se mantuvo fiel, y le sirbió por dos veces de acogida en el triste período de su decadencia política. Tenemos aun entre nosotros un recuerdo histórico de esta misma fidelidad, en el asesinato cometido por el célebre Ferran Perez Churrichans, en la persona del Arzobispo de Santiago D. Suero Gomez, partidario de D. Enrique, en el año 1366” (pp. 55-56).
Papel das mulleres
Os contidos medievais do Bosquejo histórico, político e religioso del antiguo reino de Galicia inclúen referencias a algunhas aristócratas da época, como Tutadonna Moniz de Coimbra (“Dueña Mayor”), Elvira Menéndez (“Doña Geloira o Gelvira”), Urraca I de León (“Doña Urraca”), Leonor de Guzmán (“Doña Leonor”) e Constanza de Castela (“Doña Constanza”). Porén, a representación destas mulleres limítase a breves mencións dentro das biografías ou xenealoxías dos seus pais ou esposos.
